காதல் திருமணத்தை நிச்சயிப்பது எப்படி?

13 May 2010 ·

காதல் திருமணத்தை நிச்சயிப்பது எப்படி?

மீண்டும் மீண்டும் அதே நபருடன் காதலில் விழுந்தால்தான், ஒரு திருமணம் வெற்றியடையும்!ஒரு ஆண்/பெண் அலுவலகம் செல்வதற்கு வசதியாக இருக்குமே என்று ஒரு இரு சக்கர வாகனம் வாங்கத் திட்டமிட்டால், என்னவெல்லாம் யோசிப்பார்கள்? அந்த வண்டியின் விலை, மைலேஜ், நிறம், நிறுவனம், நம்பகத்தன்மை, பயன்பாட்டுத் திறன் என பல அம்சங்களையும் அலசி ஆராய்ந்துதானே வாங்குவார்கள். ஒரு நாளில் அதிகபட்சம் அரை மணி நேரம் பயணிக்கவிருக்கும் இரு சக்கர வாகனத்துக்கே இத்தனை திட்டமிடல் தேவைப்படுகிறது. ஆனால், வாழ்க்கை முழுக்க தன்னுடன் கை கோர்த்து இரவு, பகல், கிறிஸ்துமஸ், தீபாவளி

ஜனவரி, டிசம்பர்களைக் கழிக்கவிருக்கும் வாழ்க்கைத் துணையைத் தேர்ந்தெடுப்பதில் ஒரு ஆண் அல்லது பெண் இத்தனை தெளிவாகத் திட்டமிடுகிறார்களா? தேர்ந்தெடுத்த பிறகு அந்த இரு சக்கர வாகனம் மட்டும்தான் நமக்குச் சொந்தமாகும். ஒரு திருமணத்துக்குப் பிறகு அவன்/அவளின் குடும்பம், உறவினர்கள், அவர்களின் கோபதாபங்கள் அனைத்தும் இலவச இணைப்பாக வரும். அவற்றையும் எதிர்கொண்டு சமாளிக்கும் திட்டமிருந்தால்... திருமணம் என்ற ஆபரேஷன் சக்சஸ்தான் என்கிறார் மீரா ரவி.

இவரது 'Arrange Your Love Marriage' என்ற புத்தகம் முழுக்க காதல், திருமண வடிவமெடுக்கும் போது முட்டி மோதவரும் பிரச்னைகளைப் பற்றியே முன்னோட்டங்கள். காதலிக்கும் சமயம் நீங்கள் கவனிக்க மறந்த விஷயங்களைப் பற்றிய நினைவூட்டல்களும் கூட நிறைய..!

திருமணங்கள் ஆச்சரியங்களில் நிச்சயிக்கப்படுவதில்லை!

இந்தியாவில் ஒவ்வொரு திருமணமும் பிரமாண்டக் கொண்டாட்டம். மணமேடை, நகைகள், பட்டுப் புடவை, வேஷ்டிகள், விருந்துகள் என்று இரண்டு நாள் கொண்டாட்டங்களுக்குப் பிறகு உறவினர்கள் அனைவரும் கலைந்து செல்ல, வாழ்க்கை எனும் ஓடத்தில் 'தனிமை'யில் பயணிப்பார்கள் தம்பதியர். அந்த சமயம் அவர்களுக்குள் ஏற்படும் புரிதலும் நேசமும்தான் வாழ்க்கை மொத்தத்துக்குமான எரிபொருளாக இருக்கும்.

'எனக்கு குழந்தை என்றால் மிகவும் ஆசை. ஆனால், இவன் இன்னும் மூன்று வருடங்களுக்கு குழந்தை வேண்டாம் என்கிறான்!' என்று என்னிடம் முறையிட்ட பெண், மூன்று வருடக் காதலுக்குப் பிறகு அவனை மணம் செய்து கொண்டவள்.

'அவள் அக்கா கொஞ்சம் மனநலம் பாதிக்கப்பட்டவர் என்பதை நாங்கள் காதலித்த ஐந்து ஆண்டுகளில் ஒரு முறை கூட அவள் தெரிவித்ததில்லை. அது ஏதோ பரம்பரை வியாதி என்கிறார்கள். ஐந்தாண்டு காலக் காதலில் தெரிந்து கொள்ளாத உண்மையை திருமணத்துக்கு மறுநாள் சொன்னால்... எனக்கு வரும் கோபம் நியாயமானதுதானே!' என்று விவாகரத்து கோருகிறார் ஒரு கணவர்.

"காதலிக்கிறோம் என்று சொல்லி எங்கள் வாழ்க்கையின் மூன்று பொன்னான ஆண்டுகளை வீணாக்கிவிட்டோம். அந்தக் காலகட்டம் முழுக்க நாங்கள் எவற்றைப் பற்றியெல்லாம் பேசியிருக்க வேண்டுமோ, அவற்றைத் தவிர எல்லாவற்றைப் பற்றியும் பேசியிருக்கிறோம்!' என்று புலம்பும் காதலன்/காதலி பட்டியலில் நீங்களும் இடம் பிடிக்காதீர்கள்!

'என்னுடையது இனிய இல்லறம்' என்பவர்களை உலகம் சந்தேகத்துடனேயே எதிர்கொள்கிறது!

அவள் இரவு உணவு தயாரிப்பதைக் கவனித்துக் கொண்டிருந்த கணவன் அவளிடம் கேட்டான், 'நீ ஏன் உருளைக்கிழங்குகளை இவ்வளவு பொடிப்பொடியாக நறுக்குகிறாய்?' 'என் அம்மா இப்படித்தான் நறுக்குவார்கள்!' என்றாள் மனைவி. உடனே அவன் தன் மாமியாரிடம் அதே கேள்வியைக் கேட்டான். 'என் அம்மா அப்படித்தான் நறுக்குவார்கள்... அதனால்தான்!' என்று அதே பதிலை அந்த மாமியாரும் சொன்னார். அதிர்ஷ்டவசமாக (!) மாமியாரின் அம்மா நலமாகத்தான் இருந்தார்கள். அவரிடமும் அதே கேள்வியைக் கேட்டான் அவன். 'அப்போது என்னிடம் இருந்த வறுக்கும் வாணலி சின்னதாக இருந்தது. அதனால், நான் உருளைகளை பொடிப்பொடியாக நறுக்கினேன்!' என்று காரணம் சொல்லியிருக்கிறார்.

இப்படித்தான் வழிவழியாக சில அர்த்தமில்லாத பழக்கவழக்கங்கள், நடைமுறைகள் குடும்பப் பாரம்பரியமாகத் தொட்டுத் தொடரும். அந்தக் காலத்தில் அதற்குண்டான அர்த்தங்களோடு கடைபிடிக்கப்பட்ட நடைமுறைகள், இக்காலத்தில் அர்த்தமில்லாத சம்பிரதாயங்களாக கடைபிடிக்கப்பட்டு வரும். அத்தனை வருடங்கள் நிலவி வந்த நடைமுறையை ஒரே நாளில் நம்மால் மாற்றிவிட முடியாது. அதற்காக அவற்றைச் சகித்துக் கொண்டும் இருக்க முடியாது. ஆனால், கடந்த காலம் கடந்துவிட்டது. நிகழ்காலம் நிகழ்ந்து கொண்டிருக்கிறது என்பதை நீங்கள் உணர்ந்து உங்கள் வாழ்க்கைத் துணைக்கும் புரிய வையுங்கள். எல்லாம் சுபம்!

அனைத்து துன்பங்களுக்கும் முடிவு மரணம். அனைத்து இன்பங்களுக்கும்... திருமணம்!

ஒரு சுவாரஸ்யமான பயிற்சி.

செல்போன், டி.வி, அழைப்பு மணிகள் தொந்தரவு செய்யாத ஒரு இடத்தில் தனிமையில் அமருங்கள். கண்களை மூடிக் கொண்டு உங்கள் திருமண தினத்தை கற்பனை செய்யுங்கள். உங்கள் உடை, அலங்கார நகைகள், மணமேடை அமைப்பு, எதிரே குழுமியிருக்கும் உறவினர்கள், பந்தியில் பரிமாறப்பட்டிருக்கும் உணவு வகைகள் என ஒவ்வொரு சின்னச் சின்ன நுணுக்கமான விவரங்களையும் கற்பனை செய்யுங்கள். அந்த நேரத்து உங்கள் உணர்வுகளை, மகிழ்ச்சியை மனத்திரையில் பிரதிபலிக்கச் செய்யுங்கள். அவற்றை சின்னச் சின்ன குறிப்புகளாக ஒரு தாளில் குறித்துக் கொள்ளுங்கள்.

ஓ.கே... இப்போது அதே போல உங்கள் பத்தாவது திருமண தினத்தை கற்பனை செய்யுங்கள். நீங்கள் எங்கு, என்னாவாக இருப்பீர்கள்? உங்களுக்கு எத்தனை குழந்தைகள் இருக்கும்? சொந்த வீடா... வாடகை வீடா? வீட்டில் என்னவெல்லாம் பொருட்களை அடுக்கியிருப்பீர்கள்?

கண் திறந்து இவற்றையும் ஒரு தாளில் குறித்துக் கொள்ளுங்கள்.

இந்த இரு கற்பனைகளின்போது உங்களுக்குள் இன்பம்/துன்பம்/குதூகலம்/ பயம்/அதிர்ச்சி/உற்சாகம் ஆகியவற்றில் எந்த உணர்ச்சி அதிகளவில் ஊற்றெடுக்கிறது என்பதை உணருங்கள். சந்தோஷம் சலும்பித் தளும்பினால் ஓ.கே. சங்கடங்களும் பயங்களும் பூதாகரமாக இருந்தால், உங்கள் 'ரிலேஷன்சிப்'பை நீங்கள் செப்பனிட வேண்டிய நேரம் இது. உங்களுக்கும் உங்கள் பார்ட்னருக்கும் சில வருடப் பழக்கமென்றால், இருவரும் சேர்ந்தே இந்தப் பயிற்சியை மேற்கொள்ளலாம். உங்கள் இருவரின் கற்பனை எல்லைகள் எந்தளவுக்கு விசாலமாக இருக்கின்றன என்பதை உணரலாம். முக்கியமாக,

நிழலுக்கும் நிஜத்துக்குமான இடைவெளியைக் குறைக்க இப்பயிற்சி உதவும்!

காதல் செய்யக் கற்றுக் கொள்வது போலவே... யுத்தத்துக்கும் பழகுங்கள்!

கீழ்கண்ட காரணங்கள்தான் உங்கள் திருமணத்தை தீர்மானிக்கிறதா?

"வயசாயிட்டே போகுது... இப்போ கல்யாணம் முடிக்கலைன்னா வேற எப்பதான் முடிக்கிறது?"

என் வயது நண்பர்கள் மற்றும் உறவினர்களுக்கு கல்யாணமாகி குழந்தையெல்லாம் பெற்றுவிட்டார்கள்!'

' 'என்ன இன்னும் உங்க புள்ளைக்கு கல்யாணம் முடிக்கலையா?'னு எங்க அப்பா-அம்மாவை எல்லா சொந்தக்காரங்களும் கேள்வி கேக்குறாங்க!'

'என் கல்யாணம் லேட் ஆகுறதுனால, என் தங்கச்சி கல்யாணமும் தள்ளிப் போகுது!'

'ஒருவேளை எனக்கு கல்யாணம் ஆகாமலே போயிட்டா!'

மேற்கண்ட ஏதேனும் ஒரு சூழ்நிலை நிச்சயம் உங்கள் மனநிலையில் ஒரு பிரஷர் உண்டாக்கும். அப்படியான சூழல் நீங்கள் உங்கள் திருமணம் குறித்து எடுக்கும் முடிவில் கண்டிப்பாக ஒரு பாதிப்பினை ஏற்படுத்தும். இக்கட்டுக்குப் பணிந்து ஒரு அவசர முடிவெடுத்துப் பிறகு வாழ்நாள் முழுக்க வருத்தப்பட்டு பாரம் சுமப்பதைக் காட்டிலும், நிதானமாக அலசி ஆராய்ந்து உங்கள் மனதுக்கு நெருக்கமான, விருப்பமான ஒரு முடிவெடுங்கள். முக்கியமாக, உங்கள் தீர்மானங்களுக்கு வேறு எவரையும் பொறுப்பாக்க முயற்சிக்காதீர்கள். ஏனெனில், உங்கள் வாழ்க்கை உங்கள் கையில்!

வாழ்த்துகள்!

-vikatan

0 comments:

Related Posts with Thumbnails

ஆகாயம் செய்திகளை தொடர்ந்து Email மூலம் பெறுவதற்கு இங்கே உங்களின் Email id ஐ தாருங்கள்::

மேலும் விபரம் இங்கே

For advertisements contact: aathavan53@gmail.com (Free)
There was an error in this gadget

Site Sponsors

Live Traffic Map

Add-Tamil